JEMEN og FATIMA og fleira

Jemen/Jórdaníufarar hittust í gær og dreift var farmiðum, ferðagögnum ýmiss konar og farið yfir endurbætta og lítillega breytta áætlun. Svo var drukkið kaffi og etnar með góðri lyst sýrlenskar kökur sem ég hafði með mér af Sýrlandi um daginn. Allir eru eftirvæntingarfullir og hlakka til.
Við förum eldsnemma morguns og verðum komin til Jemen, ef guð lofar, um kl. 1,30 aðfararnótt mánudags, eða hálf ellefu að íslenskum tíma.

Býst við að geta hitt félaga í Jemen sem geta gefið nokkurn veginn pottþétt upp hvað kosta muni að styrkja amk. eina jemenska stúlku - helst Fatimu í Þúla- til náms. Var að taka saman hvað væri komið inn og hér með listi yfir það.
Sjálf legg ég fram til að byrja með 250 þúsund af Hagþenkisverðlaunum. Ein félagskona sem ég held að vilji ekki láta nafn síns getið 100 þúsund.
Í þeim vísi að söfnun sem var í tengslum við afmælið mitt í febrúar komu inn 64.825 þúsund.

Tveir kvennaklúbbar eru reiðubúnir að taka þátt í verkefninu og bíða eftir áætlun um kostnað. Þeir eiga þakkir skildar svo og aðrir sem hafa lagt þessu lið.
Þá er skipulagsskrá sjóðsins í undirbúningi svo allt verði nú löglegt og fínt og gagnlegt.
Þá er meiningin að senda til kvennaverkefnisins í Líbanon smáupphæð og ég geri það þó líklega ekki fyrr en ég kem aftur frá Jemen/Jórdaníu.

Ýmsir sem hafa einnig haft spurnir af þessu hafa beðið um reikningsnúmerið. Enn er upphæðin á mínum reikningi en bý til sérreikning fljótlega. Þeir sem vilja bæta við upphæðina leggi alúðlegast inn á 1151 15 551130 og kt. 1402403979. Öll framlög eru afskaplega vel þegin.

Vil í leiðinni þakka síðasta Sýrlandshóp hvað hann hefur brugðið við skjótt og borgað inn á Mahersjóðinn.

Ítreka svo að Íransáætlunin verður sett inn á síðuna í síðasta lagi á laugardag og bið þá sem vilja láta boða sig á fundinn í júní að spjalla um þáttöku í ferðum og hafa ekki kveðið upp úr með þátttöku að láta mig vita hið allra fyrsta.

Sæl að sinni mín vænu.